1Ch 29 | ZomZIV | STEP | Tua ciangin Kumpi David in a kikhawm buppi tungah: “Pasian in a teelsa ka tapa Solomon khangmoi-in a pumpi-in tuahkhak a nei nai kei hi. Hih nasep a lian mahmah hi; bang hang hiam cih leh inn thupi lah mihing ading hi loin TOPA Pasian ading ahi hi.

1 Chronicles 29

Biakinnpi Lam nadinga Kipiate

1 Tua ciangin Kumpi David in a kikhawm buppi tungah: “Pasian in a teelsa ka tapa Solomon khangmoi-in a pumpi-in tuahkhak a nei nai kei hi. Hih nasep a lian mahmah hi; bang hang hiam cih leh inn thupi lah mihing ading hi loin TOPA Pasian ading ahi hi. 2 Ka hih theihna lamcinin ka Pasian biakinnpi ding - kham zat nading ah kham, ngun zat nading ah ngun, sumngo zat nading ah sumngo, sik zat nading ah sik, sing zat nading ah sing, hihte banah phuh dingin Onyx, suang dum-eng, suang mel tuamtuamte le suang hoih ^{▼▼29.2 Hih mun tak Hebrew in a cihnopna kician lo} namkim le suangpak - hihte khempeuh tampitak ka khol khin hi. 3 Tuate banah keima Pasian biakinnpi adingin ka apsa, keima goukholna-a ngun le khamte ka Pasian biakinnpi adingin ka pia-a, hih biakinn siangtho adingin ka khol peuhmah: 4 kham talent ^{▼▼29.4 Tua in ton 110 bang (matric ton 100 bang)} tulthum (Ophir kham) le a kisiangsaksa ngun talent ^{▼▼29.4 Tua in ton 260 bang (matric 240 bang)} tulsagih hi a, tuate innkawmte tunga luan ding, 5 kham zatna le ngun zatnate-a zat ding le khutsiamte in a sep ding uh nasepnate a zat ding ahi hi. Tu-in TOPA tungah tuni-in no utthu-in kua teng ki-ap nuam na hi uh hiam?” a ci hi.

6 Tua ciangin innkuan makaite, Israel beh uliante, a tulte a ukte le a zate a ukte le kumpipa na a semte a ukte amau utthu-in a kipia uh hi. 7 Amaute in Pasian biakinnpi lam nadingin kham talent ^{▼▼29.7 Tua in ton 190 bang (matric ton 170 bang)} tulnga le daric ^{▼▼29.7 Tua in pound 185 bang (kilogram 84 bang)} tulsawm, ngun talent ^{▼▼29.7 Tua in ton 375 bang (matric ton 345 bang)} tulsawm, sumngo talent ^{▼▼29.7 Tua in ton 615 bang(matric ton 610 bang)} tulsawm le tulgiat le sik talent ^{▼▼29.7 Tua in ton 3,750 bang (matric ton 3,450 bang)} tul zakhat a pia uh hi. 8 Suang manpha a nei peuhmah in Gershon-te Jehiel kepna mun TOPA biakinnpi goukholna ah a pia uh hi. 9 A makaite un a lungsim khempeuh uh tawh amau utthu-a TOPA tunga a kipiakna uh hangin mipite a nuam uh hi. Kumpipa David zong a nuam lua mahmah hi. ⁱ

David Thungetna

10 A kikhawm mipi bup omin David in TOPA phat a,

“Kote pa Israel Pasian TOPA aw,
tawntung pan a tawntung dongin
nang hong kiphat hen.
11 TOPA aw, leitung le vantunga na khempeuh nang aa ahi manin ^j
liatna le vangliatna nang aa hi-a,
minthanna ukzawhna le thupina nangma aa ahi hi. ^k
TOPA aw, kumpi-gam nangma aa hi a;
na khempeuh lutangin hong kitawisang hi. ^l
12 Hauhna le pahtawina nang tung panin hong pai hi a; ^m
na khempeuh a ukpa nangmah na hi hi. ⁿ
Na khut sungah na khempeuh tawisang nading le
hatsak nading hatna le vangliatna a om hi.
13 Kote Pasian aw, tu-in nang tungah lungdam kong ko uh a,
a minthang na min ka phat uh hi.

14 “Ahi zongin cinghtaka hong pia thei dingin kei kua hi a, ka mite kua ahi hiam? Na khempeuh nangmah pana hong pai hi-a, nang khut pana hong pai bek hong pia ka hi uh hi. 15 Kote le ka pute khempeuh uh nang muhna-ah pemta le mikhual ka hi uh hi. Leitungah ka nuntak hun uh lametna om loin niliim tawh kibang hi. 16 TOPA kote Pasian aw, na Min Siangtho ading biakinnpi lam nadingin kong piak uh a tampite nangma khut pana hong pai mah hi a, nangma aa vive ahi hi. 17 Ka Pasian aw, nang in lungsim na zia-et lam ka thei-a, cihtakna ah na lungkim hi. Hih nate khempeuh ka utthu-in thumaantakin kong pia hi. Tua ciangin hih lai-a om na mite in utna tawh nang hong piakzia lung nuamtakin ka mu khin hi. 18 TOPA ka pate uh Abraham, Isaac le Israel Pasian aw, na mite lungsim ah hih utna omsak den inla amaute nang tungah muanhuaisak in. 19 Tua ciangin ka tapa Solomon na thupiakte a kisapnate le na thukipte ah a lungsim khempeuh in semsak zo inla ka topsaksa inn lianpi lamna ah ki-ap zosak in,” a ci hi. ^o

20 Tua ciangin David in a kikhawm mipi buppi tungah, “TOPA note Pasian phat un,” a ci hi. Tua ciangin amaute khempeuh in TOPA a pate uh Pasian phat uh a; TOPA le kumpipa mai-ah kunin a khupbawh uh hi.

Solomon Kumpi Suak

21 A zing ciangin TOPA biakna pia in ama tungah meihal biakna-in: bawngtal tulkhat, tuutal tulkhat, le tuuno a nu tulkhat tawh dawntheih-a biakna, biakna dangte tampitak Israel khempeuh aitangin a pia uh hi. 22 Amaute in tuani-in TOPA omin ne-in dawn uh a nuam a sa uh hi. ^p

Tua ciangin amaute in David tapa Solomon a nihveina kumpipa-in sang uh a, TOPA mai-ah gam uk dingin sathau nilhin, tuateh siampi dingin Zadok sathau a nilh uh hi. 23 Tua ciangin TOPA kumpi tokhom a pa David munah kumpi in Solomon a tu hi. Amah lamzangin Israel khempeuh in a thu a mang uh hi. 24 Uliante le mi thahatte khempeuh in Kumpi David tapate tawh Kumpi Solomon tungah a tokaina-un a kiciam uh hi.

25 TOPA in Israel khempeuh muhna-ah Solomon tawisang a, ama ma-a Israel kumpite khat beek tua banga kumpi thupina a piak a om nai kei hi. ^q

David Sihna

26 Israel khempeuh a uk kumpi, Jesse tapa David ahi hi. 27 Amah in kum sawmli sung Israel uk a - Hebron ah kumthum omin Jerusalem ah kum sawmthum le sagih a om hi. 28 Amah a tek hoih bek laitakin si-a, hauhna le pahtawina ngahin sawtpi a nungta hi. A tapa Solomon in a za luah a kumpi a suak hi.

29 Kumpi David in a uk sung a kipatna pan a tawpna dong thumupa Samuel ciamtehna sung, kamsangpa Nathan ciamtehna sung le thumupa Gad ciamtehna sunga kigelh hi a, 30 ama ukna a vangliatna, ama tunga thupiang khempeuh le Israel tung le adang kumpi-gamte a, a sepnate aneng atawngin kigelh khawm ahi hi.